საიტზე მიმდინარეობს ტექნიკური სამუშაოები

ლაშა დარსალია და ხავიერ კოლომინა საოკუპაციო ხაზის გასწვრივ მდებარე სოფელ ერგნეთს ეწვივნენ

2022 წლის 28 სექტემბერს, საქართველოს საგარეო საქმეთა მინისტრის პირველი მოადგილე,ლაშა დარსალია და ნატოს გენერალური მდივნის სპეციალური წარმომადგენელი სამხრეთ კავკასიასა და ცენტრალურ აზიაში, ხავიერ კოლომინა
საოკუპაციო ხაზის გასწვრივ მდებარე სოფელ ერგნეთს ეწვივნენ.
 
ხავიერ კოლომინას ადგილზე არსებული ვითარება საქართველოს სახელმწიფო უსაფრთხოების სამსახურის წარმომადგენელმა გააცნო, რომელმაც ოკუპაციის შედეგად არსებულ გამოწვევებზე ისაუბრა.
 
საგარეო საქმეთა მინისტრის პირველმა მოადგილემ, ლაშა დარსალიამ ყურადღება გაამახვილა რუსეთის საოკუპაციო ძალების გახშირებულ პროვოკაციებზე, ე.წ. ბორდერიზაციის პროცესის გააქტიურებაზე, მავთულხლართებისა და ხელოვნური ბარიერების აღმართვაზე, აგრეთვე ადგილობრივი მაცხოვრებლების უკანონო დაკავებების  და სიცოცხლის ხელყოფის ფაქტებზე.
 
ლაშა დარსალიამ ხაზი გაუსვა აღნიშნულ ტერიტორიებზე ევროკავშირის სადამკვირვებლო მისიის შესვლის და ადგილზე საერთაშორისო ჰუმანიტარული და ადამიანის უფლებათა დაცვის ორგანიზაციების შეუზღუდავი წვდომის საჭიროებას.